N’atra granda notizza cchi ficia indimenticabila l’anniversariu ‘e sa festa fu ca Silviu ni fìcia l’onora ‘ma partecipa a li festeggiamenti. Non sapendu duva avera fattu l’appariziona l’italiani passaru nottati senza ‘ma chjùdanu occhju sonnandu chiddhi mbulicatini cchi ti sonni quandu hai ‘a freva e cchi non si’ in gradu ‘ma cunti ‘a màtina quandu ti revigghj.

S’avìanu organizzatu rondi ‘e avvistamentu in modu ‘ma si po’ sapira in tempu duva u Presidenta n’avera fattu l’onora ‘ma poggia u taccu d’a scarpa sua, ma poi penzaru ch’era cchjù bella ‘a sorpresa ‘ma tu vidi arrivara all’intresatta sulu ccu ottanta guardii d’o corpu.

All’Aquila però ‘na cosa ‘a ficiaru, nomma u fannu restara mala, cacciaru tutta l’acqua piovana cchi avia trapanatu dintru i tendi, puru si èranu antisismichi, e si passaru parola ca tutti chiddhi cc’u raffreddora ‘e mo nd’avanzi hannu ‘e dira ca su’ commossi quandu s’u trovanu davanti puru si non ava l’elmettu a la capu!

Quandu c’e l’amura c’è tuttu! Puru ca si a spassu e però cci poi stringira 'a manu a n’onorevola cchi vena e ti trova sulu quandu si ccu i pedi nt’a fossa o ‘ma ti cerca u votu on si’ cuntentu? N’atru pocu ‘a vidi processiona…. 

Dicu eu, datu ca epparu u tempu ‘ma si jungianu e ‘ma fannu nu studiu subba ssu problema cchi tantu hannu a cora, non fussera bonu si s’assetteranu na vota ppe’ tutti e seriamenta, tutti ‘nzema, vidèranu ‘ma trovanu ‘a soluziona ppe’ comu  tanti italiani malati e no hannu ‘e campara? U fattu è ca quandu viaggi nt’a treni veloci e guardi d’o finestrinu, penzi sulu a li fatti toi e non vidi tutti chiddhi cchi su’ a peda e chi ti cèrcanu ajutu. Attenziona ca ‘a velocità è pericolosa e prima o poi sbagli  nc’una curva e t’accappotti…